Adixat amics,

Ta cambia dou pergam de 1253, que-v bàlhi aci ûn recit de Simin Palay, tirat
de Tros causits de prose e de poesie, 1974, pp. 60-65, passim. Que-nse
servim d'aquéth libë au mên cours de gascoûn parisénc, e lous mêns eslhèvës
que-n tornen demanda ! Qu'espèri que v'agradera aquere espiade sus ue escole
de viladyë decap a 1880.

Plân courauméns.

J.L.


Grafie dou recoelh ; n¹éy pas segu que sie edzactemén la de Palay, mourt en
1965.

Qu'abi passat lous nau ans quoan tournèm de Bourdèu ; qu'ère la fî de
l'estiu, l'escole qu'ère en bacances mes lou 1er d'octòbre Mamâ, pùsque Papa
ère malau, que m'y amia. Lou reyent que s'aperabe M. Duvignau : beroy gouyat
tout yoen sourtit de l'escole normale, qu'ère dous enta nous auts e tout de
tire que-m troubèy à l'ayse. Petit coum ère lou bilàdye, l'escole qu'ère
« mixte », que y abè autant de dròlles que de maynades, û bintenat en tout,
e moussu-ou reyent qu'y poudè da oùrdi à l'ayse. Per aco, coum ère arribat
au darrè deu bielh Tucòu, qui, si-s parech, s'oucupabe mey de la soues
baques que dous soûs eslhèbes ‹ que s’ère maridat à la coumune dab ue
eretére prou riche ‹ M. Duvignau que trouba ue coumpagnie prou endarrèride.
Payrî que m’abè dit souben : » Lou qui sap léyi, escrìbe e ha las 4 règles,
que s’at pot bira. » Lou reyent de Tucòu que debè esta d’aquet abis, permou
ne poussabe pas mey en daban las soues leçoûs.
L’an e miey qui abi passat à Bourdèu que m’abè prou cambiat l’ana de la
bite-bitante ; lous camarades dou quartiè qu’èren desgourdits sens d’esta ço
qui, per la bile, aperaben » voyous », e noû sèy perqué lou Directou de
l’escole dou quartiè m’abè boutat au » cours moyen » doun lous eslhèhes èren
mey abançats que you e qui seguìbi peniblamén entaus estûdis ; per aco, qu’en
abi proufitat poc ou hère, de manière qu’à l’escole de Castèyde que-m
troubèy lou de daban : la permère anade noû hey que repassa, » doubla »,
coum dìsen, e souben M. Duvignau que-m hasè ha lou » mounitur » tant qui et,
desgourdibe lous petits, permou nous auts qu’èrem » lous grans ». Tant y a
qu’au die de las bacances lous quoàte dròlles e las quoàte drolles de la
permère dibisioû qu’èrem tanti-tantè, autâ sapients lous ûs que lous auts.
Malaye ! à la rentrade, M. Duvignau ne reparescou pas : qu’abè demandat à
parti enta l’Indo-Chine oun lou trattamen ère de hère miélhe que per France
oun û reyent de campagne noû gagnabe que 40 francs per mes, de que creba de
hàmi si la brabe yent noû l’abèn secourit mey ou mens.
Lou qui-u remplaça que s’aperabe Moussou Jougla. Autan M. Duvignau ère
arridoy e dous, autan M. Jougla qu’ère serious e sec ; qu’ère la soue permère
place e que boulè ha de plâ lou soû mestié, que-nse hasou ha lou doùble de
debés e apréne leçoûs à grans tros, tant pis per lou qui ne poudè pas segui,
d’aquet ne s’en dabe pas.
[...]
Mes, si boulet, que bam tourna ta l’escole. Qu’ère loegn dou bourdalat, au
mens à mieye ore de camî, e que calè puya ue coste prou arrabente sustout
enta las camotes dou me frayrot e dous petits besîs, mes aco ray ! yamey
ne-ns èm plagnuts de la fatigue. Per aco, ne calè pas pensa de tourna ta
case à miey-die enta brespeya. Que b’èy dit que lou màye repas que-s hasè de
matî, labets, hens lou caba dous libes, Mamâ que hicabe dus oéus frits, si-n
abè, ou ue lesque de yambou ou de lard ou frute permou qu’abèm prou d’àrbres
à la poumère ; qu’en abi même pendent l’ibèrn, û camarade, l’Alfred de
Poulot, que m’en hournibe. N’ère pas brigue bèstie ‹ que s’ey mourt
capitàni, de mourt soubite ‹ mes qu’abè l’esprit drin » lante » e soubèn
que-m demandabe de l’ayda à ha lous debés. A sa case, la mey grane maysoû
dou bilàdye, qu’amassaben poumes à fanègues e que las counserbaben au soulè
hens ue pièle de blat qui las goardabe de-s marfandi. A d’escus, ya s’entén,
l’Alfred, dab aqueres poumes que-m pagabe lous mes serbìcis.
L’ibèrn tabé, si-ns boulèm cauha, que-ns abèm à pourta cadû de noùste ue
legne. La coumune toutû qu’abè û gran bosc, mes lous dou Counselh que debèn
trouba qu’ère mey aysit de ha hourni pous parents lou cauhàdye de l’escole.
Aco, tabé, qu’arranyabe moussu Jougla permou que-s poudè ha còse lou toupî
de soupe daban lou noùste hoec ; dab ço qui-u pechè lou Goubernement, pràube
d’et, be-b pensat que ne poudè pas paga-s ue pensioû à l’aubèrye ? E que
m’èy toustem pensat que la Léonie dou Poulot doun lou casau ère
toque-toucant dab la cour de l’escole, qu’ou hournibe à gràtis lou legumàdye
e lhèu bère lesque de lard ta la garbure qui-u passabe per dessus la
murralhe. D’alhous, à maugrat dous parents qui aberen si-m pénsi, boulut û
yéndre paysâ, la Léonie e moussu Jougla que s’espousèn.
Quine idée e-u passa pou cap à moussu-ou Reyent à la rentrade de 1884 de-m
boulé presenta entau certificat (lous paysâs que dìsen çantificat) n’at sèy ;
yamey, à Castèyde, nad àute reyent ne s’ère sayat à presenta û eslhèbe, e
toutû qu’en abèn debut abé de capàbles ; que y abè quàuques òmis madus e
gouyats que s’en mancabe que houssen pècs, mes atau qu’ère. N’abi que ounze
ans, que calé ue dispense d’àdye : moussu Jougla que l’oubtiengou. Coum ne
douttàbi d’arré, que-m digouy : » Bole qu’en àne ! » e tout brèspe, après
l’escole, lou reyent que se-m goardabe à bèts cops mey d’ue ore enta-m farci
la cabuchole de causes dount crey plâ que noû-m soy yamey serbit, lous
problèmes, per exémple.
E lou terrìble die qu’arriba. Qu’èrem au mes de yulh ; que calè puya dinqu’au
Castèt de Mountanè ; que partim, moussu Jougla e you de boû matî à pè. Au
segu, qu’ère sus lous nèrbis mey que you e noû cessa pas de m’enterrouga
tout lou loung dou camî ue ore durant. La semmane d’aban que m’abè dit :
 » Des renseignements que j’ai pu avoir, il est probable que vous serez
(que-m bouseyabe) interrogé en Histoire, du règne d’Henri IV à la
Révolution : repassez bien les faits et dates de cette période. »
Malaye ! Quoan arriba lou me tour, l’examinatou que-m demanda : » Que
savez-vous du règne de Charlemagne ? »
‹ » Charlemagne fut sacré empereur en l’an 800. » (N’èy yamey, de l’Istòri
de France retiengut que tres ou quoàte dates : aquere, la de l’assessinat
d’Enric IV, 1610 e la de la prese de la Bastille 1789).
‹ » Mais ensuite ? » si-m hè lou me martirisàyre.
‹ » Ensuite, je sais des histoires.  » E sens aténde, qu’ou te debani la
hèyte dous escouliès plaçats lous boûs à drete e lous auts à gauche, la dou
Saxoû qui s’ère troubat mau en béde, dou soum d’ue tour, arriba l’ost qui
miabe lou barbe flourit, la mourt de Roland e que sèy you ?Š Mes aquet
couquî d’òmi que m’atendè au cutour : » Comment s’appelait le père de
Charlemagne ? » Qu’at sabi, mes ne-m poudouy pas rebremba lou soû noum e que
demourèy bouque cousude. Que bedi plâ moussu Jougla qui lhebabe lou soû
paraplouye (la hèyte qu’ère publique) mes ne sabi pas qu’û paraplouye que-s
disè tabé un » pépin ». Benaye Diu, la reyente de Mountanè, Mme Tapie,
qu’arriba au me secours. Que b’èy à dise qu’abi leyit û libe d’Augustin
Thierry dat à l’escole per û moussu Tourasse de Pau e qui ère sarcit
d’istòries, que poudouy counta la hèyte d’aquet Pépin quoan abè tuat lou
Lioû e lou Tàure, e quauque aute, de manière que l’examinatou que hé :
 » Bien. Allez vous asseoir. » E you countent.
Que m’en arriba d’autes encoère aquet die, mes recebut qu’estouy e, si noû-m
troùmpi, dab mencioû. Moussu Gueit-Dessus, de Mountanè, qui ère, si crey,
counselhè yenerau dou cantoû, que-m dé û louis d’or de bint francs qui-m
serbi ta-m besti ta la permère coumunioû qui n’abi pas hèyte, permou que
n’abi pas encoère doudze ans, e qu’ous calè ; ne la hasouy que l’an d’après,
lou 12 d’abriu 1886.
Mes lou qui ère lou mey fièr, qu’ère M. Jougla. En û petit bilàdye coum lou
noùste aquet aha dou » çantificat » qu’abè prés l’endoum d’û fèyt coum en
seré estat û maridàdye ou la bastisse d’ue borde ; touts que s’y
enteressaben, e quoan entrèm à Doat, quàsi sus toutes las portes quauqu’û
que demaudabe : » Eh dounc, quin s’ey passat aquet çantificat ? » E
moussu-ou reyent que respounè fièramen : « Nous revenons avec un grand
succès. » La bouts que-u ne tremoulabe. E quoan se sabou que M. Gueit que
m’abè dat bint liures ‹ ue soume per labets ‹ que crey qu’estouy sacrat ço
qui apèren adare » un as ».
Pràube de you ! B’ère toutû bertadère la paraule dou me Payrî qui m’abè
souben dit : » Que-s haré û bèt lìbe dab ço qui ne sàbes pas. »
Que demourèy à l’escole dinqu’à las bacances ; qu’y hasi sustout lou
 » mounitur » mes û cop la porte clabade, papa, ya que soullicitat dem hica
au coulèdye de Bic, que-m bouta l’agulhe aus digts e que hey l’aprentissàdye
dou mestié de talhur (1885).
Per aco, la rèume de leyi ne-m diminua pas ; Papa n’y metè pas empach, au
coùntre, e que passèy touts lous libes qui poudouy abé, même » Les orateurs
célèbres » oun counegouy Cicéron e Mirabeau, e tabé las trayedies de
Corneille e de Racine eretades dou défunt Payrî, dab lou Boû Diu sìe !
Mes que countinuàbi, per aco, de segui la bite-bitante paysane dou
bourdalat, permou, qu’at cau dise, ne y abè pas toustem tribalh ta you à la
boutigue dou me pay, e qu’anàbi ayda lous besîs à heya, semia, castagna
quoan s’escadè.
Entertan, permou n’abi pas hèyt encoère la permère coumunioû, que seguìbi
lou catechisme. E lou gran die qu’arriba : qu’ère lou 12 d’abriu de 1886.
Qu’en èy goardat à l’esprit ue mèrque qui ne passera pas.